Jeta Osh Qef
Home

Shpërthen Artan Hoxha: Liruat nga burgu vrasësit e Gërdecit dhe 21 Janarit, ju jeni…
Nga: S.Shtjefni | Publikuar më: 12.09.2017, 14:16

  • Share
  • Share
  • Share
  • Share
Gazetari investigativ Artan Hoxha ka “shpërthyer” në një status që ka postuar në proflin e tij në Facebook.

Hoxha shkruan se populli ynë ka 25 vite që masakrohet.

Statusi i plotë i Artan Hoxhës:

Korporata e miliarderëve, latifondistëve, ndërtuesve, pronarëve të hoteleve dhe vilave turistike, reagon se i është prekur dinjiteti, pse i janë hequr nja 20 kokrrave vizat amerikane. Po ju nuk u duhet hequr viza, këtë e keni sorbetto për shpëlarje.

Ju u duhet hequr pasuria, diamantet që mbani në duar e qafë, makinat luksoze dhe vilat në bregdet. Po ku keni dinjitet ju që e keni masakruar këtë popull për 25 vite.

I vodhët pronat, tokat e kullotat, shtëpitë prej qerpiçi e kullat ne Alpe, u vodhët lopen në haur dhe pulat në kotec. I futet në vëllavrasje, u shkatërruat familjet dhe jetën.

Nuk latë fakir e hallexhi, nga jugu në veri pa i plasur në burg si kriminelë.

Nuk latë kriminel e hajdut, nga Konispoli në Vermosh pa i liruar nga burgu si gjynafqarë. Për çfarë dinjiteti flisni ju mor të pafytyrë?! Po si u tha gjuha dhe nuk e ngritët njëherë zërin për kolegun tuaj që e masakruan në mes Vlorës ditën për diell. E harruat Skerdilajd Konomin si një trung të djegur nga mafia e pronave, pse fitoi pronën e trashëguar në Gjirin e Lalzit. Po ç'dinjitet keni ju, kur liruat nga burgu vrasësit e Gërdecit dhe 21 Janarit, kur votuat alla-manita 5-0, atë që del dhe u mbron sot nga mëngjesi në darkë.

Çfarë ligji keni zbatuar ju, kë politikan kusar dhe qeveritar hajdut dënuat ju?

Kujt nga këta që u morën nga kursi i Plepave dhe u bën zengjine, i treguat burgun. Ndërsa popullin, e ropët përsëgjalli, ia morët gjithcka kishte. Edhe qindarkën e fundit, edhe jetën ia morët.

I treguat derën e burgut edhe për një faturë dritash të papaguar, kushtonte sa mëngjesi juaj.

Katilë e xhahilë, të pafytyrë dhe të pacipë, matrapazë edhe kusarë si jeni, edhe pikën e fundit ia thithët si shushunja këtij vendi.

"Nderi", "burrëria", "dinjiteti" dhe "integriteti" juaj u prekërka pse u hoqën mundësinë të harxhoni një qime nga pasuria juaj përtej oqeanit.

Ai apo ata që u kanë premtuar se do t’u kalojnë pa lagur nga kjo furtunë, ju kanë mashtruar. Këtë radhë nuk keni derman, as ju dhe as ata. Ulni kokën si të menderosur dhe nxirosur që jeni, vrisni mendjen si do e shpëtoni pasurinë tuaj, se te dera po u troket ai që s'ja u pret mendja... Ptuuuu farë e keqe, edhe në varr doni ta merrni me vete këtë popull.