Jeta Osh Qef
Home

Shkëmbi 1 ton u shkëput nga lartësia dhe i zuri poshtë, i riu rrëfen tmerrin: Ngriva, u fola çunave...
Nga: F.Tenolli | Publikuar më: 06.12.2017, 17:33

  • Share
  • Share
  • Share
  • Share
Shkëmbi 1 ton godet makinën në ecje, i riu tregon tmerrin: Ngriva në vend, u fola çunave…

Të gjithëve na kujtohet tragjedia e dy muajve më parë në Torovicë të Lezhës, ku humbën jetën tre persona si pasojë e shkëputjes së një masivi shkëmbor mbi një fuoristradë.

E njëjta histori mund të ishte përsëritur në fshatin Golik të Pogradecit, kur një masiv shkëmbi goditi cepin e makinës me të cilën udhëtonin tre të rinj.

Fati ishte me ta dhe të rinjtë shpëtuan me dëmtime të lehta.

Ndërtimi i rrugës Qukës–Qafë Plloçë ka zgjatur më shumë se një vit dhe ky ishte shkaku i rënies së masivit shkëmbor.

23-vjeçari Xhenis Kapri, ishte drejtuesi i automjetit dhe sëbashku me të makinë udhëtonin edhe dy shokët e tij.

Xhenisi tregon tmerrin e mbrëmjes të së hënës dhe si shpëtuan nga ngjarja fatale për pak centimetra.

Një pjesë nga intervista, raporton Panorama:

Xhenis a mund të na tregosh si ndodhi ngjarja?

Isha në fshatin ngjitur sepse çuam motrën e njërit prej shokëve të mi dhe kjo është e vetmja rrugë që të çon atje. Kur kaluam, rruga ishte e hapur dhe nuk kishte asnjë lloj problemi, përveç baltës dhe gropave, që janë si pasojë e punimeve që po bëhen. E lamë atje dhe u nisëm për t’u kthyer në shtëpi. Kur u afruam te ky vend, pamë një makinë që po vinte në krahun tjetër dhe iu afrova pak më shumë anës së malit, në mënyrë që të shkëmbeheshim pa probleme. Po lëvizja shumë ngadalë sepse rruga është e keqe dhe nuk ke mundësi për të ecur shpejt. Në një moment, diçka goditi makinën dhe nuk munda ta kuptoj çfarë ishte.

Çfarë ndodhi më pas?

Ngriva në vend. U fola çunave për t’u siguruar që ishin mirë dhe u kërkova të dilnin. Makina nuk po fikej dhe u thirra të dilnin jashtë se mos shpërthente ndonjë gjë. Në atë moment, ata u përpoqën të hapnin derën, por nuk e hapnin dot. Kemi dalë nga ana tjetër, ndërsa njëri nga dritarja sepse ishte e pamundur të dilte. Kur dolëm dhe kontrolluam, pamë që kishte rënë një shkëmb në krah të makinës.

Si vepruat më tej?

Telefonuam njerëzit tanë dhe Policinë. Ishim të tmerruar. Ky shkëmb është thuajse 1 ton, nuk dua ta imagjinoj ç’mund të kishte ndodhur nëse do të na kishte rënë sipër. Për fatin tonë, shpëtuam mrekullisht, vetëm me disa dëmtime të vogla, ndërsa makina është e shkatërruar.

Sipas jush, pse erdhi ky aksident, çfarë ndodhi?

Këtu po bëhen punimet për rrugën e re Qukës-Qafë Plloçë. Prej kohësh është një gjendje e frikshme. Vazhdimisht bien gurë nga lart. Ke frikë të kalosh, si ditën edhe natën. Qoftë në këmbë, qoftë me makinë, këtu nuk ke qetësi kur kalon. Duket që edhe nga shirat e ditëve të fundit, u bë më e lehtë shkëputja e shkëmbinjve nga faqja e malit. Këta që po bëjnë rrugën, nuk kanë marrë asnjë masë sigurie. Është e frikshme të jetosh kështu çdo ditë. Kemi ngelur në dorë të Zotit se nga dora e njeriut vetëm e keqja po na vjen. Tabela rruga nuk ka, errësirë e tmerrshme, gurët që bien në çdo moment. Kur do marrë masa firma apo kur të vdesin njerëz? Duhet të merren masa dhe përgjegjësia t’i shkojë kujt i takon, mund të kishin humbur jetën tre persona këtu. Dikush duhet ta zgjidhë këtë çështje.