Vrasja e 28-vjeçarit Mario Majollari pak ditë më parë në zonën e Kinostudios ka prekur zemrat e shumë shqiptarëve, për shkak se ai u vra për të paguar mbi krimet e kryera nga i ati.

Mario u vra poshtë shtëpisë ku banonte bashkë me të ëmën dhe motrën, ndërsa fqinjët deklaruan ditën tjetër se ai ishte një djalë shumë i mirë dhe se nuk e meritonte atë fund.

28-vjeçari kishte kërkuar azil në Suedi, mirëpo autoritetet atje nuk ia kishin mundësuar duke u bazuar edhe në njoftimin që kishin marrë nga autoritetet shqiptare, të cilat nuk e cilësonin në rrezik jetën e Marios këtu.

Dhimbja për familjen e të riut nuk është aspak e lehtë dhe këtë e shprehin edhe me postimet e tyre në Facebook.

Motra e Marios ka publikuar sot një video ku shfaqet me të vëllain, një video shumë prekëse kur i sheh sa të lumtur dukeshin dikur.

Ata shfaqen duke kënduar këngën "Mirëmëngjes dashni" dhe e motra ka shkëputur fragmentin "Bota ime je".